1. Ol pà trit

2. Órs col strachì de taègg e pir

3. Söpa de érs

4. Arèngh a la gradisèla col pedersèm

5. Lömaghe a raanèl

6. Polènta e sìgole

7. Marmelada de pomàtes vércc

8. Turta co la maschèrpa

Ol pà trit

Ingredièncc:

300 gram de pà gratàt
1 lìter de bröd de erdüra (o de càren)
2 spighe de ài
2 cügià de formài grana gratàt
2 cügià de öle de ülìa, de chèl bù
sal

Preparassiù

Fà bói 'l bröd in d'öna pignata e üdàga dét, póch a la ólta, ol pà gratàt coi dò spighe de ài. Lassà bói a belasì per vinte menücc.
Tö fò 'l ài e mèt ol rèst in di scödèle co la sal, 'l öle e 'l formài, ognü segónd ol sò göst.

Órs col strachì de taègg e pir

Ingredièncc per quàter persune:

200 gram de órs
2 pir
100 gram de strachì
1 lìter de bröd de erdüra
formài grana gratàt
pedersèm
pana e sal

Preparassiù

Mèt dét in d'öna bèla pignata 'l órs col bröd e fàl bói per trènta menücc.
Tirà vià i chistù di pir e teài zó a fète sitile; zontàgle al órs e mèt amò la pignata söl föch per sich menücc. Preparà 'l strachì teàt a cübècc e mes-cià 'l töt per quach menücc, insèma a du cügià de pana, öna spolverada de formài grana gratàt e ü pér de spissighì de pedersèm. Servì la pitansa bèla cólda.

Söpa de érs

Preparassiù

Teà zó ü bèl vérs in quàter tòch, dòpo ì bötàt vià i fòe e i còste piö gròsse. Lassàl bói per trènta menücc e fàl isfregì 'n d'öna pignata con dét de l'aqua frègia. Dòpo quach menücc fà sgotà 'l vérs e mètel in d'öna bièla con dét öna nus de bötér, sìgola tridada e ü tochèl de lard. Fà rosolà per quìndes menücc e, se ocór, zontàga dét del bröd de erdüra.
Quando l'è bèl e còcc, preparà 'n di fondine i fète de pà sèch e sversàga sura ol bröd coi érs. Completà la pitansa con del formài grana gratàt, segónd ol göst de ognü.

Arèngh a la gradisèla col pedersèm

Ingredièncc per quàter persune:

8 arèngh gròss
öle de ülìa
ài
pedersèm
sal, pìer

Preparassiù

Netà bé i arèngh, col tiràga fò töcc i bödèi, e bötài dét in d'ü padelòt con tat öle d'ülìa, 'l ài, 'l pedersèm, la sal e ü spissighì de pìer. Lassà 'l töt a màsera per dò ure e dòpo ì sgotàt i arèngh, pondìi sö la gradisèla sbroiéta, sich menücc per banda.
Servì 'n tàola co la polènta brüstülida.

Lömaghe a raanèl

Ingredièncc:

500 gram de lömaghe bèle nète
1 sìgola
1 caròtola
öle de ülìa
ài
pedersèm
sal e pìer

Preparassiù:

In d'öna bèla pignata còmoda mèt dét tri lìter de aqua, la sìgola, la caròtola e i lömaghe. Fàle bói per quase trè ure e sgotàle; lassà sfregì i lömaghe e dòpo che i è stace teade a fetine sitile (a raanèl), consà co la sal, ol pìer, 'l öle, 'l pedersèm e, per chi che l'völ, öna góta de asìt balsàmegh. Servì dét in di scödeline de tèra còcia, 'nsèma a ü bù formài a "pasta crüda".

Polènta e sìgole

Preparassiù
Intàt che la polènta l'è dré a cös in del stignàt, a s'fà rosolà in d'öna bièla quach sìgole teade zó a fetine sitile con di tochèi de pansèta, e co la zónta de quach cügià de bröd.
Quando la polènta l'è còcia, pondìla in d'öna fundina e 'n del mès mètega dét ol pucì de sìgole.

Marmelada de pomàtes vércc

Ingredièncc:

1 chilo de pomàtes vércc
500 gram de söcher
2 limù

Preparassiù:

Teà zó a fetine i pomàtes vércc bèi laàcc e pondìi dét in d'öna scödèla de tèra còcia 'nsèma al söcher spandìt sura, e lassà possà per vintequàtr'ure. Üdà 'l töt dét in d'öna bièla col giüs e la rösca de du limù. Fà cös per alméno trè ure e la marmelada l'è prónta de sigilà 'n di scatolòcc.

Turta co la maschèrpa

Ingredièncc per sés/vòt persune:

10 méche stantide opör öna pagnòta de quase 600 gram
300 gram de maschèrpa
150 gram de cuèi (spinasse selvàdeghe) o erbète
20 gram de sìgola
250 gram de lacc
4 öv
öle o bötér

Preparassiù

Teà zó 'l pà a fète e sistemàle con cüra söl fónd d'öna tégia; mèt a rosolà la sìgola con d'ü cügianì de öle (o bötér) e bötàga dét i cuèi teàcc; fà rosolà 'l töt per sich menücc e ünìga dét la maschèrpa, ol pìer e la sal. Preparà la turta col mèt ü pià, pò la erdüra, pò amò 'l pà, pòò la erdüra, sèmper issé. In d'ü pignatì sbàt i quàtr'öv e zontàga dét ol lacc: spantegà 'l compòst sura la turta, prima de mètela 'n del fùren per 20/25 menücc a 180 °C.